Siglir tar il cuntegn

Header

cuntegn

Perscrutaziun Novas enconuschientschas davart Long-Covid

Per pazientas e pazients da Long-Covid datti bunas novas. In team da perscrutaziun da l'universitad e da l'ospital universitar da Turitg han pudì identifitgar in muster en ils proteins da sang da persunas che pateschan da Long-Covid.

Tar las persunas pertutgadas na ruaussia il sistem che cumbatta infecziuns betg suenter che l'infecziun è passada e quai chaschunia donns vi da las cellas, uschia ils auturs dal studi ch'è vegnì publitgà en il magazin dal fatg «Science». Questas enconuschientschas pudessan en l'avegnir servir ad ina meglra diagnosa ed uschia er ad in tractament pli sistematic.

Dentant han ils perscrutaders per la scuverta dals marcaders da sang nizzegià ina procedura cumplexa che na po tenor Onur Boyman, il manader dal studi e directur da la clinica per immunologia a l'ospital universitar da Turitg, betg vegnir duvrada en il mintgadi da l'ospital. In tal test fiss tenor l'immunolog dentant ordvart nizzaivel, per exempel per distinguer Long-Covid dad autras malsognas che mainan a sintoms sumegliants.

Ils perscrutaders e las perscrutadras da l’universitad e da l’ospital universitar da Turitg han intercurì passa 6'500 proteins en il sang da 113 infectads da corona e 39 persunas saunas. Tar ils infectads, dals quals 40 han sviluppà Long-Covid, han els suenter sis e dudesch mais puspè intercurì il muster da sang.

RTR novitads 06:00

Artitgels legids il pli savens