La cifra da persunas che van a vuschar variescha adina puspè – influenza ha era il tema da votaziun. Ils ultims onns era la participaziun tar votaziuns naziunalas savens enturn 50%. La pli auta participaziun ha la Svizra gì dal 1992 cura che la populaziun ha ditg Na a l’entrada en l'EWR, il spazi economic europeic. La è 78% dal suveran ì a l’urna.
Motivs per pitschna participaziun da glieud giuvna
Sco emprim stoppian ins tenor Andreas Glaser, directur dal center da democrazia ad Aarau vesair la proporziun en la populaziun. La cumpart da persunas pli veglias è pli gronda ed uschia sa mussa quai era a votaziuns. Tenor el saja quai dentant effectiv uschia, che persunas giuvnas van pli pauc a vuschar. D'eruir il pertge, saja grev.
Persunas cun ina furmaziun pli auta van era pli savens a vuschar. Bain pussaivel che betg tut las persunas giuvnas han insumma gia a fin lur scolaziun. Motivs vesa el era tar la cumplexitad da votaziuns ed era tar la mancanza da temp. In motiv savessan era esser ils temas. Tar dumondas d’impostas u rentas sa sentan persunas tranter 18 e 24 main pertutgadas. Cun vegnir pli vegl pudess quai dentant sa midar.
Instruments per motivar
En connex cun simplifitgar l'access per persunas giuvnas vegn savens menziunà l'e-voting. In studi da Elsevier, ina chasa editura scientifica è dentant vegnì a la conclusiun che l'e-voting ha nagin effect sin la participaziun da vuschar.
In ulteriur instrument èn buns da democrazia. L'idea è che persunas che van a vuschar survegnan per exempel buns per la cultura u per il traffic public. Quai possian ins far, dentant per tut la populaziun e betg mo per giuvens, è l'opiniun dad Andreas Glaser. Sche mo persunas giuvnas survegnissan in bun da motivaziun alura fiss quai discriminond envers persunas pli veglias.
E lura datti anc il mecanissem cuntrari. Numnadamain che persunas che na van betg a vuschar u eleger survegnan ina multa. En l'Australia saja quai perfin il cas ch’ins stoppia ir en praschun sch’ins va repetidamain betg a vuschar. En il chantun Schaffusa datti ina multa da sis francs per mintga votaziun ch’ins manchenta. Quai è tenor dretg svizzer pussaivel. Dentant fa Andreas Glaser la dumonda sche quai è la dretga via da sfurzar glieud a l’urna. La democrazia sa basa numnadamain sin atgna iniziativa.
Ussa cun tendenzas autocratas dapertut pudess la glieud puspè daventar pli conscienta da la valur da la democrazia.
Temas che vegnan proximamain avant il pievel pudessan tenor Andreas Glaser era interessar pli fitg la glieud giuvna, per exempel ils contracts tranter la Svizra e l’Uniun europeica. La fin dettia adina undas – che persunas èn pli activas cun vuschar e lura puspè main.