Corona chaschuna a las Viafiers federalas ina perdita da record. La dumonda è sa sminuida per in terz, uschia che la bilantscha dal concern da l'onn 2020 mussa ina perdita da 617 milliuns francs.
Bler damain viagiaturs
La raschun per quella perdita è cler e net la pandemia da corona. En media ha la SBB l'onn passà pudì transportar anc 843'000 viagiaturs. Quai è passa in terz damain che l'onn avant. Ils kilometers da persunas èn tut èn tut sa reducids per 40,6%. Latiers hai dà ina reducziun per 43,7% en il traffic a distanza e 32,4% en il traffic regiunal. Anc pli drastic è la reducziun tar il traffic internaziunal stà – quai cun 51,2%.
Program da spargn
Dapi la primavaira 2020 spargnan las Viafiers federalas, tranter auter na vegn betg engaschà persunal en l'administraziun, communitgescha la SBB. Vitiers spostia ella investiziuns e realiseschia projects tenor impurtanza. Uschia haja il concern gia pudì realisar in effect da spargn en l'autezza da tschient milliuns.
La liquiditad da las Viafiers federalas vegn garantida da la Confederaziun. Ultra da quai hai dà l'onn passà in program d'agid per il traffic public.