Damai che las victualias vegnan adina pli charas en Svizra, duain ils partenaris socials discutar davart augments da paja. Quai pretenda il minister d’economia Guy Parmelin en l’intervista cun il «SonntagsBlick». Tut tenor possia la Confederaziun sustegnair chasadas cun entradas bassas, per exempel cun prestaziuns supplementaras. La dumonda per sustegn finanzial è gia daventà in politicum. Uschia pretenda la Partida socialdemocrata meds supplementars per tut las chasadas da la classa mesauna e per quellas cun entradas bassas.
Crisas alimentaras
Durant ch’il provediment saja actualmain garantì en Svizra, pateschian auters stadis gia pli fitg dals custs pli auts. Quai cunzunt en l’Africa dal Nord ed en il Proxim Orient che dependan da la granezza bunmartgada da l’Ucraina e da la Russia. Crisas alimentaras pudessan destabilisar questas regiuns ed uschia provocar novs conflicts e chaschunar novas undas da fugitivs.
