L'onn 2021, en il segund onn da la pandemia, ha il museum scrit in minus da radund 254'000 francs. Positiv saja il svilup da visitaders e visitadras, ins haja vendì 775'000 bigliets, 205'000 dapli che l'onn avant. Sco il museum a Lucerna communitgescha, hajan ins avant la pandemia stgars 1 milliun visitaders ad onn.
Gia l'onn 2020 ha il museum nudà ina perdita. Cun stgars 387'000 francs era quella però anc pli auta che l'onn 2021. La davosa giada han els l'onn 2002 scrit cifras cotschnas.
Puspè dapli classas da scola
Il 1. da mars 2021 ha il museum puspè pudì avrir las portas suenter ina serrada da dus mais e mez causa la pandemia. Pervia dal certificat obligatoric e la purschida limitada eran ils giasts pli precauts da far ina nova commembranza. Era excursiuns cun classas da scola sajan stadas ina sfida. Perquai saja tant pli allegraivel ch'il dumber da scolars saja stà l'onn 2021 uschè aut sco la davosa giada l'onn 2016. En tut han passa 3'000 classas da scola (+242%) e cun quai sur 52'000 scolaras e scolasts visità il museum.
