Avant tschintg onns saja el stà l'emprima giada president da la Confederaziun – ed alura haja la pandemia occupà tuts e tuttas. Il tema sanadad è stà preschent per tuts. Oz saja quai in zic auter, di il president da la Confederaziun, Guy Parmelin, en ses pled a chaschun dal di dals malsauns.
Malgrà che la pandemia è passada, enconuschian era uss blers ina persuna en lur conturn che saja pertutgada d'ina malsogna. Ed era per persunas malsaunas saja impurtant d'esser autonomas ed integradas. Perquai saja quai il motto da quest di dals malsauns.
Savens dettia dentant era muments nua che l'autonomia na saja betg dada. En contact cun persunas dal fatg, cun instituziuns e process ch'èn predefinids.
Blers pensan: 'Mes parents enconuschan bain mai – quels san co decider.' Ma discurrer sur dals giavischs dat segirtad.
Perquai saja impurtant da sa barattar cun auters pertutgads, quai dettia sustegn. Ed era cun il partenari e la partenaria, cun la famiglia – per sclerir chaussas ch'ins pensa che sajan cleras – ma in discurs dettia scleriment.
Nus n'essan betg persuls
Era en situaziuns grevas n'è dentant nagin persul. Quai ha Guy Parmelin era constatà ils davos mais. Nus sajan ina cuminanza – e quella saja la pli ferma sche nagin na saja sclaus – sche tuts èn integrads.
Avant dus mais sajan bleras persunas giuvnas vegnidas blessadas a Crans-Montana – ils maletgs han commuventà tuts e tuttas. Ma en ils mais dapi lura haja el era vis fermezza tar las unfrendas – malgrà las dolurs. E speranza – malgrà malsegirtad.
Perquai saja ses appel al di da malsauns: Guardai in da l'auter.
