10% dapli svieuta, 8,5% anc sch'ins curregia per midadas tar ils curs da valutas estras. Tge che tuna d'in resultat fitg positiv saja principalmain in resultat da la chareschia. Nestlé lascha pajar ils consuments dapli per ils products. Mo 1% da l'augment da la svieuta è perquai che Nestlé venda dapli. Quai mussan las cifras per ils emprims 9 mais dal 2022.
Il svilup variescha tranter differentas sorts products
Il gigant da mangiativas ha vendì dapli pavel d'animals, aua minerala e dultschergnims. Quai perquai che la glieud haja consumà dapli ordaifer suenter la pandemia. L'inflaziun mussa dentant gia in effect sin il consum total, quel va levet enavos dapi l'atun per 0,2%.
Sper quai constatescha il concern ch'ils products da Nespresso sa vendan betg pli uschè bun. Pussaivel perquai che blers na lavuran betg pli a chasa. Er il gudogn cun pizzas schelentadas e products finids va enavos, medemamain quel cun products da latg.
