Suenter las elecziuns dals 20 d'october 2019 tuts che discurrivan anc da l'unda verda e da la tematica da la midada dal clima. Ma lura è corona vegnì, e l'unda verda è ida in zic en emblidanza. Tuttina, corona n'ha betg prendì dal tut il schlantsch da questa unda. Era pliras elecziuns en ils chantuns han mussà che questa unda verda exista anc.
I vegn lavurà vinavant davos portas serradas en noss parlament vi da la protecziun dal clima. Forsa cun in zic pli pauc preschientscha mediala. La pandemia svanescha, ma la crisa dal clima lezza resta.
Partida verda cun cleras mesiras
La sonda han ils Verds svizzers approvà lur plan dal clima. Quel prevesa che la Svizra vegn neutrala al clima fin il 2030. Cuntanscher questas finamiras vulan ils Verds tranter auter, cun scumandar davent dal 2025 tut ils vehichels novs che dovran combustibels fossils sco benzin u diesel. Ed en quatter onns duai er esser a fin cun novs stgaudaments d’ieli. Tenor il politolog Clau Dermont, sajan mesiras definidas cleramain, ina buna strategia da la partida. Era el manegia che l'unda verda na saja anc betg tschessada.
