Per reducir las emissiuns da CO2 en Svizra duai la politica sa concentrar sin uschenumnadas «taxas directivas» – pia sin taxas per bigliets da sgol, benzin ed ieli da stgaudar. Tenor ina retschertga represchentativa da l’institut da perscrutaziun «gfs.Turitg» hajan quellas il pli grond sustegn en la populaziun. 47% da las persunas dumandadas sajan per ina lescha da CO2 che sa basa surtut sin taxas directivas. Be 17% refuseschian quai. Sin il segund plaz suondian las subvenziuns cun 38%. Percunter sajan 56% da las persunas dumandadas s’exprimidas cunter scumonds.
Nova lescha ha fatg naufragi il 2021
Il zercladur 2021 aveva la lescha da CO2 fatg naufragi a l'urna. ll suveran svizzer aveva refusà cun 51,6% la revisiun da la lescha ch'ha vulì sbassar las emissiuns. Sulettamain en il vest, da Basilea-Citad e Turitg ha la dumonda gì sustegn. Per il Cussegl federal ed il parlament è quai stà ina terrada suenter lungas debattas e discussiuns.
