Siglir tar il cuntegn

Header

cuntegn

Pratteln 2022 Deficit da bunamain 4 milliuns tar festa da lutga

La festa da lutga federala (ESAF) en il chantun Basilea-Champagna è stada l’onn passà bunamain quatter milliuns pli chara che planisada. Sper sponsurs e persunas privatas duain ussa era ils pajataglias dal chantun Basilea-Champagna gidar finanzialmain. Il parlament chantunal ha approvà ina contribuziun da 500’000 francs. Cun quella ha la maioritad dal parlament vulì evitar in concurs da l’uniun. Tgi che stat bun per ils 3,3 milliuns francs restants na vul il OK betg far public.

Critica vegn da vart cotschen-verda

Tranter sutgas e bancs èn stad la PS, Verds e la Partida evangelica. Els han argumentà ch’il chantun na respectia betg ils princips dal stadi da dretg. La finala sa tractia tar il ESAF d’ina organisaziun privata. I na saja betg l’incumbensa dal maun public da simplamain metter a disposiziun supplementarmain daners, sch’i dat in minus. Quest sustegn supplementar stgaffeschia in pregiudizi. Tras quai pudessan numnadamain er auters organisaturs privats sco per exempel uniuns da gimnastica spluntar tar il chantun, sche lur budget na va betg si. In emprest senza tschains fiss stà la meglra opziun, uschia la represchentanta da la PS.

Quai èn ils motivs per il deficit

Il ESAF ha gì lieu l’avust 2022 a Pratteln. Il november avevan las persunas responsablas communitgà ch’il stadi intermediar dal rendaquint final dal ESAF fetschia quitads. Sco motivs per il deficit ha il comité d’organisaziun er numnà custs pli auts per avrir il terren e per la segirezza sco er entradas pli pitschnas tar ils bigliets da VIP e tar las entradas da support.

audio
Per tadlar: las novitads da las 15:00
ord RTR Audio dals 16.02.2023.
laschar ir. Durada: 4 minutas 12 Secundas.

RTR novitads 15:00

Artitgels legids il pli savens