La Banca naziunala svizra (BNS) ed il Museum istoric da Berna envidan persunas interessadas da scuvrir il «Moneyvers» – in'exposiziun interactiva che collia l'istorgia dals daners, l'economia e la societad.
Invista en il mund monetar
Il «Moneyverse» che sa chatta datier da la Plazza federala a Berna porscha ina preschentaziun cumplessiva davart il tema daners e quai or da quatter perspectivas: istoric, economic, social e persunal. L'exposiziun è gratuitamain accessibla e sa drizza ad in vast public, tranter auter er a classas da scola. Cun elements interactivs e guidas auditivas en quatter linguas, dentant betg rumantsch, vegn il tema fatg palpabel per las visitadras ed ils visitaders.
La rolla da la Banca naziunala
En il plaun sutterran da l'exposiziun stat la Banca naziunala svizra (BNS) en il focus. Visitadras e visitaders vegnan a savair, co ch'il tschains directiv vegn fixà e tge consequenzas che quai ha per l'economia. Tematicas cuntraversas sco la surpigliada da la Credit Suisse han medemamain plaz. Ultra da quai dattan las collavuraturas ed ils collavuraturs da la BNS invista en lur lavur.
L'istorgia tutga il temp modern
Il sguard istoric mussa il svilup dals daners cun agid d'objects che servivan ina giada sco med da pajar. En la «Money Bar» pon las visitadras ed ils visitaders discutar davart temas monetars tar coctails senza alcohol sco per exemple in «Salary Sour» u in «Cryptopolitan».
Dapli dal museum Moneyverse
Cooperaziun tranter la BNS ed il museum
L'exposiziun sa basa per gronda part sin objects ord il fundus dal museum istoric da Berna ed amplifitgescha quels cun novas perspectivas. La stretga collavuraziun tranter la BNS ed il Museum istoric bernais vegn descritta sco fitg impurtanta per il success da l’exposiziun. Entant che la banca naziunala finanziescha il project, surpiglia il museum la gestiun.