Archeologia ed art - Uffants avran museums ad Andeer ed a Spleia

Suenter dis da project intensivs han classas da scola da la Valragn e da la Val Schons transfurmà duas stallas betg pli duvradas ad Andeer ed a Spleia en museums. Davos il project «Museums archeologics per il preschent» stat la Scola auta da pedagogia dal Grischun. L’avertura a Spleia è stada ils 27 da mars ed ils 31 da mars è quella ad Andeer.

Las exposiziuns collian il passà ed il preschent: En ina part mussan las scolaras ed ils scolars objects istorics da la regiun – per exempel utensils u parts da la construcziun – ch’els han examinà sezs. En ina segunda part vegnan interpretads da nov objects dal mintgadi sco ina tastatura da computer u in animal da plisch.

Exposiziuns èn avertas fin l'atun

Speziala è era l’organisaziun: Ils uffants surpiglian sezs ina rolla centrala da la planisaziun, sur la furmaziun fin a l’intermediaziun. Els mainan las visitadras ed ils visitaders tras las exposiziuns e dattan infurmaziuns fundadas tar ils exponats.

Ils museums restan averts fin l’atun e porschan regularmain visitas guidadas publicas. Il project ha la finamira da cumbinar l’emprender istoric, la lavur artistica e la furmaziun per in svilup duraivel. El vegn sustegnì tranter auter dal Parc natiral Beverin sco era da differentas instituziuns culturalas e regiunalas.