Fitg chara è vinavant rauba d'import. Quels han custà il fanadur 8,4% dapli che l'onn passà. Tar la rauba da la Svizra ha la chareschia muntà a be 1,8%. Cun quai èn las cifras restadas entaifer las stimaziuns dal economs – quellas han dentant varià fermamain. Quels avevan quintà cun ina inflaziun da tranter 3,0 e 3,7%.
La stabilitad dals pretschs resultia da svilups cuntraris: Ils pretschs d’ieli da stgaudar sajan sa reducids, medemamain quels per vestgadira e chalzers grazia la vendita a pretschs reducids. Percunter sajan ils pretschs da gas e da la parahotellaria creschids.
Aut nivel per la Svizra – ma betg cumpareglià internaziunal
L'inflaziun en Svizra giascha cun sias novas valurs vinavant sin in nivel bass, cumpareglià internaziunalmain. La chareschia en la zona da l'euro è stada il fanadur cun 8,9% uschè auta sco anc mai dapi l'introducziun da la munaida il 1999. En ils Stadis Unids è l'inflaziun stada cun 9,1% uschè auta sco betg pli dapi il december 1981.
La Banca naziunala svizra aveva auzà mez zercladur ses tschains directiv per 0,5% sin -0,25%. Quai cun menziunar l'inflaziun ch'ins ha spetgà. Cun quai ha ella per l'emprima giada dapi 15 onns puspè augmentà la pressiun sin il tschains.
