Siglir tar il cuntegn

Header

purtret dal logo da Pfizer
Legenda: Keystone
cuntegn

Problems da producziun Pfizer sbassa finamira per furnir vaccin

Betg pli 100 milliuns dosas mabain 50 milliuns dosas vul il concern da Pfizer furnir fin la fin da quest onn. Raschun ch'il concern ha stuì smesar la finamira sajan problems tar la chadaina da producziun, ha declerà ina pledadra dal concern. L'engrondiment giaja pli ditg che pensà.

Er ils resultats dal studi clinic sajan la finala arrivads pli tard che planisà. Tenor la gasetta «Wall Street Journal» haja il concern anc fin il november vulì sa tegnair vid il dumber oriund. Per l'onn che vegn restia Pfizer er tar quest plan da furnir ina milliarda dosas, scriva la gasetta.

Tgi che vul sa laschar vaccinar, dovra duas dosas dal vaccin da Pfizer. Pfizer ha sviluppà il vaccin ensemen cun il producent Biontech da la Germania.

En il rapport da la gasetta hai plinavant num, ch'intginas parts dal vaccin n'hajan betg correspundì al standart, sajan stads manglus. Quai haja declerà ina persuna involvida tar il svilup dal vaccin. Sin ina dumonda per resposta n'haja il concern anc betg respundì.

Gronda Britannia ha dà lubientscha sco emprim pajais

En la Gronda Britannia ha il vaccin da Pfizer e Biontech survegnì ina lubientscha d'urgenza. Quai è l'emprim pajais che ha cun quai lubì in vaccin encunter corona. L'autoritad per medicaments en ils Stadis Unidsa e l'Agentura europeica per medicaments examineschan il mument er talas dumondas per lubientschas d'urgenza.

RTR novitads 06:00

Artitgels legids il pli savens

Scrollar a sanestra Scrollar a dretga