La Procura publica federala (PPF) pretenda danovamain la creaziun dad in nov cumissariat per delicts da cyber tar la Polizia federala FedPol. Ils privels actuals en connex cun la guerra en l'Ucraina mussian anc pli cler ch'i dovria policists e procuraturas publicas spezialisadas. Las sfidas en quest sectur vegnian adina pli grondas. Quai scriva la procura publica federala glindesdi saira en il rom d'in rapport da la Controlla federala da finanzas (EFK).
La procura sezza ha dapi tschintg onns dus teams responsabels cun dus procuraturs publics spezialisads. Lur spazi d'agir saja però fitg limità. Blers chantuns han oz gia in cumissariat per cybercriminalitad. Il Cussegl federal ha fin uss dentant refusà in sin nivel federal. Uschè ina unitad organisatorica inflexibla na saja betg desiderabla.
