Tuns in zic esters èn stads d’udir quels dis en il Collège de Candolle a Genevra. Rumantsch grischun, per las ureglias francofonas da las scolaras e dals scolars probabel ina premiera. La raschun: L'Emna rumantscha vegn festivada quest onn era en la part dal vest da la Svizra.
Vegnida lantschada è l’emna internaziunala da la lingua e da la cultura rumantscha cun musica e pleds. Era da l’iniziant da l'Emna rumantscha, il Cusseglier federal Ignazio Cassis, hai dà in bainvegni.
Ed il minister da l’exteriur ha era gist prendi la chaschun ed ha instituì las scolaras ed ils scolars sco ambassaduras ed ambassadurs da la plurilinguitad.
Presenta a l'avertura da l’emna rumantscha a Genevra è era stada ina delegaziun grischuna, manada dal cusseglier guvernativ Jon Domenic Parolini. Suenter Turitg l'onn passà, la pli gronda vischnanca rumantscha ordaifer il Grischun, saja stà ina decisiun logica da purtar il linguatg e la cultura rumantscha era ella part francofona da la Svizra, ha el manegià.
Quai è impurtant perquai che nus avain quatter linguas en noss pajais e gist la Svizra franzosa ha ina gronda simpatia per la quadrilinguitad ed era per il rumantsch.
Dà suatientscha a l'invit ha era la cussegliera guvernativa da Genevra, Anne Hiltpold. La responsabla dal departament da l'educaziun publica, da la furmaziun e da la giuventetgna è persvada ch'igl è absolutamain necessari da mussar a las scolaras ed als scolars ch'igl è impurtant da tgirar nossas linguas ed en spezial era il rumantsch.
Jau pens che nus stuain mussar tge ritgezza che quai è. I dat auters pajais, nua che umans se battan pervia da las linguas e tar nus èsi reussì da mantegnair quatter linguas. Igl è era protecziun da las minoritads, igl è nossa coesiun, igl è nossa identitad. Jau crai che quai stuain propi mantegnair quai.
Suenter la part uffiziala èsi lura vegnì concret. Las scolaras ed ils scolars han survegnì in'invista en la quarta lingua naziunala. E quai a moda fitg pratica e cun ina finamira clera, declera Linard Martinelli da la Lia Rumantscha:
Dar ina pitschna invista, metter in pign sem qua a Genevra per che forsa survegnani perfin gust d'emprender rumantsch, survegnan era il sentiment, ah, quai rumantsch è tuttina insatge viv e ch'ins po era laschar viver.
E quai para d'esser reussì – l’interess per il rumantsch sveglià tar las scolaras ed ils scolars dal Collège de Candolle.
Avant na savev’jau betg ch'i dettia gia plirs dialects, pliras sorts da rumantsch. E jau na savevel era betg ch'i dettia era autras linguas che sumeglian il rumantsch, quai en auters pajais en l'Europa.
Ed era a ses conscolar èn tschertas infurmaziuns restadas.
A mai è cunzunt dà en egl ch'i deva blers pleds che vesevan ora sco spagnol u talian. Schizunt la pronunzia era sumeglianta. Jau chat ch'i tuna magari sumegliant al portugais. Jau erel magari surstà, quai n'aveva jau betg spetgà. Jau pensava plitost ch'i sumegliava al tudestg ni uschia insatge.
Il sem è pia semnà ed il viadi da l'Emna rumantscha duai cuntinuar. L'auter onn lura en il Tessin, quai en tutta cas il plan e la speranza dals organisaturs.