A chaschun da la quarta ediziun da «l'emna rumantscha», ha lieu a Milaun in inscunter cun il tema: «Dalle parole alle idee: sei regioni svizzere e italiana in dialogo» («Dals pleds a las ideas: sis regiuns svizras e talianas en il dialog»). Il tema da glindesdi saira è la moda persistenta, e la musica.
Per la part musicala procura Gino Clavuot, era enconuschent sco «Snook», ensemen cun la scola primara da la Scola svizra a Milaun. Ensemen cun ils scolars e las scolaras vegn el a chantar sia chanzun «Ladina».
Per Gino Clavuot ina pussaivladad da motivar ils uffants per la lingua e per s'engaschar per quella. Oravant tut impurtant saja per el da cumbinar l'interess per la lingua cun la musica, per era pudair motivar ils uffants – che n'avessan pli probabel betg bler gust da simplamain far teoria da lingua.
La chanzun «Ladina» saja tenor Snook era in bun exempel per la collavuraziun da differentas linguas – e per la motivaziun d'emprender in'autra lingua per la musica. Manon Ulli che chanta la part feminina è da Turitg e na sa betg rumantsch. Il medem valia per il chor african ch'ins auda. Era quels hajan emprendì la part rumantscha per pudair chantar la chanzun.
