Dus terz da las persunas rumantschas vivan ordaifer il territori rumantsch. E lur lingua vul la Confederaziun mantegnair. Quai duai vegnir scrit explicitamain en la lescha da linguas, propona il Cussegl federal.
La Lia Rumantscha beneventa la proposta. L'adattaziun faschess pussaivel da finanziar projects rumantschs ordaifer dal territori rumantsch. Tenor Andreas Gabriel, president interim da la Lia Rumantscha, in pass impurtant. La Confederaziun renconuschia cun la midada sia responsabladad en quai champ.
Er la directura da l'Uffizi federal da cultura Carine Bachmann tschantscha d'in pass extrem impurtant. L'uffizi haja il giavisch da lavurar cun la communitad rumantscha. Ils uffants a Turitg, quai saja l'accent ch'il messadi mettia en il futur.
«Messadi per la promoziun da la cultura» 2025 – 2028
Il Cussegl federal vul er trair las conclusiuns or da la crisa da corona. Quai munta d'ina vart ina transfurmaziun digitala. Da l'autra vart er che las persunas che creeschan cultura stattan en il center da la promoziun. Entras la crisa da corona è la cultura svizra vegnida fermamain sut squitsch. Tenor il Cussegl federal ha ella mussa si differentas mancanzas en la lescha actuala.
Il messadi per la promoziun da la cultura per ils onns 2025 fin 2028 va uss en consultaziun fin ils 22 da settember. Radund ina milliarda francs è prevesida per la promoziun. Reparter quels daners duain l'Uffizi federal la cultura, la Pro Helvetia ed il Museum naziunal svizzer.
Ils daners duain tenor communcaziun vegnir investids pli ferm en la transfurmaziun digitala, en las cundziuns da lavur, la persistenza e er en la cooperaziun.
