Il provediment d'electricitad e da gas saja segirà, ma la situaziun anc adina tendida, di Brigitt Mader da l'Uffizi federal d'energia a Berna. Quai demussian ils pretschs volatils sin la fiera da gas. Ina tscherta malsegirtad restia perquai che la Svizra importescha ina part da l'electricitad da l'exteriur ed era perquai ch'ins na sa betg sch'i dettia ina perioda da fradaglia lunga quest enviern.
La Confederaziun haja dentant fatg lur pensums, sa Brigitt Mader. Per exempel tegnan ils lais da serra enavos aua en cas ch'i vegnia stretg vers la fin da l'enviern. Er èn las ovras da reserva prontas e las interpresas da gas han reservas – quellas sa chattan en l'exteriur, en Svizra na datti nagins deposits da gas.
Uschia desista er il Cussegl federal da far ina campagna da spargnar energia. Sa calmada dal tuttafatg n'è la situaziun dentant anc betg. Spargnar energia è anc adina cusseglià. Quai schanegia tant l'ambient sco era l'atgna bursa. E las mesiras per impedir ina mancanza d'energia èn anc adina valaivlas e pon vegnir activadas sch'i dat ina situaziun precara.
