Svizras e Svizzers paran d'esser pli pronts ch'era gia d'acceptar mesiras pli drasticas per refurmar il provediment da vegliadetgna.
Per quatter da tschintg assicurads d'ina cassa da pensiun è ina refurma necessaria, quai mussa ina retschertga da l'assicuranza Axa. A la medema dumonda fatga avant quatter onns eran mo trais da tschintg da l'avis, ch'i dovria ina refurma dal provediment da vegliadetgna.
La retschertga mussa che la prontezza crescha – d'acceptar mesiras sco in augment da la vegliadetgna da renta, u scursaniziuns da las rentas.
3a sco correctura da spargnar
Tenor la retschertga acceptassan 45% dals dumandads da lavurar pli ditg e 23% ina reducziun da la renta. Il 2018 eran be 26% persuenter da lavurar pli ditg e 15% eran d'accord cun ina reducziun da la renta.
La mesira la pli populara d'ina correctura tar il provediment da vegliadetgna è anc adina la varianta d'in pajament voluntari 3a. Da quest avis èn 86% dals assicurads.