A la radunanza da delegads digitala da la PPS Svizra ha il president da la partida, Marco Chiesa, pretendì dal Cussegl federal dad immediat avrir las butias e las ustarias. Tut las cifras-clav en connex cun il coronavirus en Svizra sajan sa reducidas, ha argumentà Chiesa. Plinavant ha el pretendì che las scolas restian avertas e ch’i dettia controllas sistematicas e tests da corona als cunfins. Er stoppia il tempo da vaccinar s’augmentar.
Per la PPS haja la protecziun da la sanadad da la populaziun prioritad. Tuttina na dastgian las plazzas da lavur e l’economia betg vegnir emblidadas – uschia Chiesa.
Trais giadas Gea
Ultra da quai ha la radunanza da delegads decidì las parolas per las votaziuns dals 7 da mars. La PPS recumonda da dir trais giadas Gea, quai a la lescha davart la e-ID, al scumond da cuvrir la fatscha sco a la cunvegna economica tranter ils stadis da l'EFTA e l'Indonesia.
