Il mardi ha gì lieu la radunanza generala da cumià da la banca Credit Suisse suenter ch'ella è vegnida cumprada da l'UBS per 3 milliardas francs.
Il president dal cussegl administrativ Axel P. Lehmann ha intunà en ses pled d'avertura che las unicas opziuns sajan stadas la fusiun cun l'UBS u il concurs. El sa veglia stgisar per avair trumpà ils acziunaris.
Er il CEO Ulrich Körner ha ditg ch'el haja chapientscha per la ravgia e la dischillusiun. In collaps da la Credit Suisse fiss stà ina catastrofa per la Svizra ed il mund, per quai saja l'uniun cun l'UBS stada l'unica opziun.
Ravgia ma betg bler da decider
Approvar u refusar l'acquisiziun da la Credit Suisse tras l'UBS na pon ils acziunaris e las acziunarias betg, ella è vegnida decisa dal Cussegl federal sin basa da dretg d'urgenza. Per ils acziunarias vul quai dir che lur aczias valan be pli 76 raps – ina fracziun da lur veglia valur.
Durant la radunanza han adina puspè discurrì acziunaris cun gronda ravgia, frustraziun e dischillusiun davart la fin da la banca cun ina grond'istorgia. In oratur ha schizunt ditg ch'ils responsabels fissan vegnids crucifitgads en il temp medieval.
Bonus e l'elecziun dal cussegl administrativ
Bler da discurrer han plinavant er dà las bunificaziuns, damai las pajas ed ils bonus per il cussegl administrativ e la direcziun. E quai malgrà che la direcziun da la CS vul entant desister d'in bonus spezial per top-caders.
La radunanza generala ha lura er approvà il rapport da bunificaziun en maniera extrem stgarsa cun 50,06% da las vuschs. La bunificaziun da la direcziun ha la radunanza refusà cun be 48,21% vuschs da las 50% necessarias. Il cussegl administrativ è vegnì reelegì, president Axel Lehmann ha fatg 56% da las vuschs.
