La digitalisaziun è ina nova sfida per l'economia. Quai di la cumissiun da concurrenza, Weko. Da big data fin plattafurmas online datti dasper tut las schanzas era ristgs ch’ins stoppia tegnair en egl, scriva la Weko en il rapport annual ch'è vegnì preschentà oz. La selecziun, tge cas che vegnian intercurids, saja ina sfida, di il directur da la Weko, Patrik Ducrey. La Weko sa concentreschia sin cas entaifer la Svizra.
Tar cas internaziunals, tranter auter cunter gigants da tecnologia sco Google, observia la Weko las decisiuns, per exempel da l'Uniun europeica, e decidia lura co agir. I na fetschia qua betg senn da far atgnas retschertgas. E quella pratica saja sa cumprovada.
Midada da lescha da cartel
Dapi l'entschatta da l'onn ha la Weko ina nova incumbensa. Cun las midadas en la lescha da cartel, datti da nov il concept da la pussanza relativa sin il martgà. Concret pon interpresas annunziar maldiever supponì da firmas cun gronda pussanza. Maldiever po esser, sch'ina interpresa cun gronda pussanza refusa senza motiv ad in'autra interpresa la furniziun da parts che lezza dovra.
La cumissiun da concurrenza spetga blers cas en quest connex, fin uss n'hai dentant betg dà grondas midadas. La Weko ha 2021 decis en quatter cas, 2020 eran quai sis, ed 11 cas il 2019.
