Siglir tar il cuntegn

Header

cuntegn

«Reanimaziun da las relaziuns» Macron e Cassis sa scuntran a Paris

Bain avevan ils eveniments dals davos onns chaschuna «bloccadas», ha il president da la Confederaziun Ignazio Cassis admess tar sia visita a Paris – i saja dentant da guardar en il futur. Er il president franzos Emmanuel Macron saja pront per cumenzar da nov optimisticamain.

Avant la decisiun cunter l'aviun franzos e per il F-35 or da l'America devi anc bler visitas or da la Frantscha. Per exempel era la ministra da defensiun u il minister d'economia vegnida a Berna. Cura ch'i era cler che la fatschenta gronda d'armas cun la Frantscha na gartegia betg, eri silsuenter ruassaivel.

Avant in onn ha president Macron ditg giu ina scuntrada cun il president da la Confederaziun, Guy Parmelin. Raschun uffiziala: problems da termins. Uss hai dà ina scuntrada a Paris tranter Macron e Cassis per ina mesa ura. Tranter auter eran las relaziuns bilateralas e las relaziuns cun l'Uniun Europeica tema.

Emmanuel Macron, Ignazio Cassis e Brigitte Macron
Legenda: Emmanuel Macron, Ignazio Cassis e Brigitte Macron tar la scuntrada a Paris. Keystone

Tenor Cassis saja era Emmanuel Macron pront per cumenzar da nov optimisticamain. I saja da guardar en il futur.

I era temp per reanimar las relaziuns diplomaticas.
Autur: Ignazio Cassis President da la Confederaziun

Tar las dissonanzas tranter la Frantscha èsi er vegnì perquai che la Svizra aveva martgadà fitg ditg cun la Frantscha davart il aviun da cumbat Rafale. Sche la Svizra avess cumprà quel, avess la regenza franzosa tranter auter sustegnì la Svizra tar las tractativas davart la cunvegna da basa. Ed ella avess laschà a la Svizra taglias dad cunfinaris en autezza da circa 3,5 milliardas. Uschia retschertgas da Radio SRF.

Per la decisiun da la Svizra n'aveva la Frantscha silsuenter nagina chapientscha. Ina autra raschun ch'i era suenter uschè ditg quiet tranter la Svizra e la Frantscha po era esser ch'il Cussegl federal ha chalà da contractar cun l'UE davart la cunvegna da basa.

President Cassis ha envidà Macron da visitar la Svizra per cumenzar cun ils discurs.

audio
Per tadlar: las novitads da las 14:00
ord RTR Audio dals 12.11.2022.
laschar ir. Durada: 3 minutas 18 Secundas.

RTR novitads 11:00

Artitgels legids il pli savens

Scrollar a sanestra Scrollar a dretga