Il Cussegl federal vul rinforzar la regulaziun dal luf. Lufs che chaschunan donns e ch'èn gia lubids da sajettar duain pudair vegnir sajettads durant l'entir onn ed er en asils da chatscha.
La regenza ha mesemna lantschà la discussiun davart adattaziuns correspundentas en la lescha da chatscha. Circuls e partidas interessadas pon s'exprimer en chaussa fin ils 16 d'october.
Tenor il dretg vertent èn lufs che fan part d'in triep protegids cumplettamain tranter il favrer ed il matg pervi da la reproducziun.
Excepziuns valan en cas d'in privel gravant e direct per umans. En asils da selvaschina èsi scumandà da sajettar lufs sco spezia protegida, schizunt sch'ils animals guntgeschan repetidamain mesiras per la protecziun da muntaneras u pericliteschan umans.
Proteger l'economia d'alp
Singuls lufs che fan problems duain en l'avegnir er pudair vegnir sajettads tranter il favrer ed il matg, e da nov er en asils da selvaschina federals – quai sch'els stgarpan repetidamain animals da niz malgrà mesiras da protecziun u pericliteschan umans.
Uschia realisescha el duas incumbensas dal parlament. Il motiv è il quità che l'economia d'alp vegnia sut squitsch perquai che il dumber da stgarps tras lufs s'augmenta. La protecziun da muntaneras saja bain vegnida meglierada, dentant chara e cun in effect limità – perquai duai la regulaziun dals lufs problematics vegnir levgiada.
Cussegl federal vuleva spetgar
En il parlament datti resistenza cunter las schluccadas planisadas tar la protecziun dal luf. Critichers argumenteschan che la regulaziun saja gia vegnida schluccada e mesiras da protecziun da muntaneras hajan reducì ils donns – intervenziuns supplementaras na sajan betg necessarias.
Era il cusseglier federal Albert Rösti aveva pledà per in Na a rinforzaments: il dretg vertent lubeschia gia intervenziuns, per exempel da sajettar lufs singuls durant l'entir onn. Ulteriuras schluccadas pudessan plinavant cuntrafar a la lescha da chatscha e protecziun d'animals.
Dapi il favrer 2025 dastgan chantuns regular l'effectiv da lufs a moda preventiva sut tschertas cundiziuns, per exempel tar ristga per animals da niz.
Tenor il Cussegl federal mussan questas mesiras gia effect: la creschientscha da la populaziun da lufs è vegnida franada, er sch'il dumber da trieps crescha vinavant.