Il Parc Naziunal Svizzer vul s’engaschar pli ferm per la coexistenza tranter persunas ed animals da rapina gronds sco lufs, urs e lufs-tscherver. Suenter il sajettar il triep dal Fuorn durant l’enviern 2024/25 ha la Cumissiun federala dal parc naziunal lantschà il program «Parc Naziunal ed animals da rapina gronds».
Igl è ussa noss’incumbensa da chattar ina moda da viver cun il luf.
Il program duai gidar da meglierar la protecziun da muntaneras, sustegnair l’agricultura e rinforzar la retschertga scientifica. Dapi la furmaziun dal triep en la regiun dal Pass dal Fuorn il 2023 ha il parc observà emprimas midadas en la fauna. Uschia pudess il dumber da chavriels e vulps esser sa reducì localmain, ed era ils tschiervs hajan midà lur cumportament.
Tenor la scienzada dal Parc Naziunal Svizzer, Pia Anderwald, saja cler ch’il luf restia en Svizra: «Igl è ussa noss’incumbensa da chattar ina moda da viver cun el.»
Anc be paucas datas
Il program cumpiglia tschintg champs: dretg, societad, retschertga, monitoring sco era management e protecziun da muntaneras. Tranter auter vegnan animals equipads cun emetturs per observar meglier il cumportament sin las alps.
Tenor il parc manca dentant anc la basa da datas a lunga vista. Il luf saja pir dapi curt temp en il parc, uschia che resultats dal tuttafatg exactas na sajan anc betg pussibels.
Sch'i vegn sajettà in triep perda la scienza datas impurtantas perquai che nus na pudain betg pli observar quest triep
Il responsabel da communicaziun dal parc naziunal, Hans Lozza, punctuescha che persunas al lieu stoppian vegnir integradas en il process: «Nus ans sviluppain vinavant sch’i dat dialog, temp ed experientschas.»
Il parc vul perquai collavurar pli stretg cun purs ed organisaziuns en la regiun e promover soluziuns sco chauns da protecziun e novs sistems tecnics.