Saja quai durant sia professiun sco directur dal Parc Naziunal Svizzer durant ils onns 1996 enfin 2019, ma era suenter en la pensiun ha Heinrich Haller fotografà e documentà il luf en divers pajais. Per realisar ses cudesch ha el sur trais onns fotografà, documentà e rimnà infurmaziuns e material.
Il cudesch «Il luf – pendulari tranter natira e cultura» intermediescha invistas centralas davart l’impurtanza ecologica, culturala ed emoziunala dal luf – en spezial en il context da las Svizra e dal territori alpin. Heinrich Haller ha però era visità il nord da l’Europa en Finlanda, il Yellowstone en America e passantà diversas emnas en l’Asia a Ladak, Tibet e Nepal nua ch’el ha gì l’occasiun dad observar e studegiar il luf.
Protecziun da muntaneras
Durant la preschentaziun da ses cudesch ha l'anteriur directur Heinrich Haller era menziunà las mesiras da protecziun da muntaneras en connex cun il luf. Davart quai ha el manegià il suandant:
Ina protecziun da muntaneras consequenta e sur tut la surfatscha è la mesira la pli effizienta per sa proteger.
Natiralmain saja impurtant dad eliminar lufs problematics en il rom dal management dal luf. Sajettar percunter in triep na saja betg la soluziun, sco quai ch'igl è capità sin il Pass dal Fuorn en vischinanza dal Parc Naziunal Svizzer.
Adattà al tema
L'onn 2019 ha Heinrich Haller dà giu ses post sco directur dal Parc Naziunal Svizzer. Ensemen cun RTR ha el dà in sguard enavos.