Almain 50 schurnalists èn vegnids mazzads quest onn pervi da lur lavur.
Cumpareglià cun l’onn passà na saja la situaziun betg sa meglierada ferm, scriva l’organisaziun «reporters senza cunfins» en sia bilantscha da quest onn davart la libertad da pressa.
La gronda part dals schurnalists sajan vegnids mazzads perquai ch’els hajan fatg retschertgas davart temas sco la corrupziun, la criminalitad organisada u la destrucziun da l’ambient. Sco l’organisaziun scriva vinavant sajan ils pajais ils pli privlus per schurnalists actualmain il Mexico, l’Irac, l’Afganistan, l’India e il Pakistan. Ils ultims 10 onns èn vegnids mazzads almain 937 schurnalists, il 2019 èn quai stads 53.
Vitiers vegnian tschients morts sin l'entir mund pervi da Covid-19. Quants dad els che sajan morts en consequenza da lur lavur vi dal virus, na possian ins betg constatar. Almain trias sajan dentant morts perquai ch'els n'hajan betg survegnì l'agid medicinal necessari, damai ch'els erian serrads en praschuns en l'Egipta, la Russia e l'Arabia Saudita.
Cun l'execuziun da Ruhollah Sam en l'Iran, ils 12 da december, è l'emprima giada dapi 30 onns in schurnalist vegnì sentenzià a la mort e la paina da mort er execuida.
