Plirs investiders instituziunals dumondan la «Credit Suisse» per dapli transparenza en connex cun l'effect da ses commerzi sin il clima. La fundaziun per l'investiziun Ethos, l'organisaziun englaisa Shareaction e l'uniun svizra per investiziuns responsablas, vulan inoltrar ina resoluziun dal clima tar la proxima radunanza generala da la Credit Suisse. La banca s'engaschia anc memia fitg tar la finanziaziun d'interpresas, en il sectur da l'energia fossila. Dapi 2015 haja la banca investì passa 75 milliardas francs en quest sectur.
Tenor Ethos sustegnian 11 investiders instituziunals la dumonda – tranter auter la cassa da pensiun da la Confederaziun, da la Posta, sco er dals chantuns Berna e da la citad da Turitg. Shareaction ha inizià ina resoluziun dal clima tar Barclays 2020. La banca è silsuenter stada l'emprima banca gronda europeica ch'è s'obligada ad ina finamira da netto-nulla.
