Pervia da tschajera, vias glischnas e stgirezza èsi durant l'atun ed l'enviern da dar spezialmain adatg co sa cumportar sin las vias. I n'importa betg sche a pe, cun il velo, il moto u cun l'auto – tgi ch'è bain preparà, arriva segir a la finamira. Quests tips gidan d'era restar segir sin las vias sut cundiziuns pli pretensiusas.
A pe: visibel, preparà e mai persul
- Planisai avunda temp – cun stress crescha il ristg d'in accident.
- Mai sche pussibel betg persul a pe, cunzunt sch'i è gia stgir.
- Purtai vestgadira clera u cun reflecturs – era sin il satgados.
- Faschai senza retegnientschas diever da meds d'agid sco «spikes» u channas.
- Glisch da frunt gidan en zonas senza glisch.
Cun il velo: glisch, profil ed ir defensiv
- Ina bun'illuminaziun è obligatorica – idealmain cun agid d'in «Nabendynamo».
- Reflecturs vi da la vestgadira ed il velo rendan Vus pli visibel.
- Manischai a moda prevesenta e cun in tempo adattà.
- Pneus cun in bun profil tegnan meglier en cas d'aura bletscha.
- Cun e-bikes èsi d'ir spezialmain precaut sin vias glischnas.
Cun il moto: visibel, chaud e defensiv
- Purtai vestgadira che reflectescha ed ina chapellina clera.
- Prendai visiers clers enstagl da visiers tenschids.
- Manischai pli precaut ch'usità – ils pneus drovan dapli temp per stgaudar.
- Faschai diever da manetschs u vestgadira che sa stgauda per far frunt a la fradaglia.
- Quintai cun la pussibilitad ch'ils auters sin las vias han in'attenziun reducida.
Cun l'auto: controllar la tecnica e prender resguard
- Controllai la glisch, la batteria ed ils sfruschavaiders (tudestg: Scheibenwischer).
- Schubregiai tut il glatsch e la naiv da l'auto avant che sa metter sin via – igl na tanscha betg da be avair cucheras pitschnas sin la fanestra.
- In sgrattin per prender davent il glatsch, ina scua per la naiv ed eventualmain chadainas da naiv tutgan en l'auto.
- Na laschai betg vegnir a chaud il motor durant star airi – quai n'è betg lubì.
- Guardai adina ordavant tge che vegn e prendai resguard sin participants al traffic ch'èn pli flaivels.
Tscherner ils dretgs pneus: pneus d'enviern u quels da l'entir onn?
- Pneus d'enviern n'èn betg obligatorics, ma fitg ferm recummands.
- Resguardai la vegliadegna (max. 10 onns) ed il profil dals pneus.
- Tests da pneus da l'internet pon gidar d'eleger pneus adattads – cunzunt tar pneus da «budget».
- Pneus da l'entir onn èn be adattà per persunas ch'èn be da rar sin via u en regiuns plattas.
- Chadainas da naiv èn be obligatoricas sche quai è signalisà uschia.
Or da l'archiv: