Siglir tar il cuntegn

Header

Grafica fidanza en Cussegl federal sminuescha
Legenda: Cun durada da la crisa sminuescha la fidanza en il Cussegl federal. RTR, Grafica
cuntegn

Retschertga sotomo Fidanza en Cussegl federal patescha

Malgrà che la fidanza en il Cussegl federal è sa sminuida, è l'acceptanza per mesiras sco mascras gronda. Quai mussa ina retschertga sin incumbensa da la SRG SSR.

Il zercladur han 66% da la populaziun anc gì gronda fidanza en il Cussegl federal. Uss è quella ida enavos marcantamain – be 37% inditgeschan d'anc avair gronda fidanza. Durant l'emprima unda, il mars, avrigl e matg era la fidanza adina tar passa 60%.

Grafica fidanza CF
Legenda: RTR Grafica

Er las regenzas dals chantuns han da cumbatter cun pli pauca fidanza. Uschia inditgeschan be 27% ch'i hajan gronda enfin fitg gronda fidanza en lur regenzas chantunalas. Qua giavischa trais quarts da la populaziun dapli centralisaziun, pia mesiras unifitgadas sin nivel naziunal.

Sustegn per mesiras sco mascras

In'auter maletg sa mussa pertutgant l'acceptanza da mascras. L'avrigl era quella anc bassa, be 39% han sustegnì in obligatori da mascras en butias. Sumegliant hai er vesì or il zercladur, cun 35%. Uss sustegnan 76% l'obligatori en butias. 65% beneventa er in tal a la plazza da lavur. Era ina maioritad inditgescha ch'i saja en urden d'avair punctual in obligatori da mascras en il liber. Tala acceptanza ha la mascra sco accessori dal mintgadi dentant pir survegnì l'ultim temp.

Grafica acceptanza mascras
Legenda: La sceptica da la primavaira puncto mascras è sa midada en acceptanza. RTR Grafica

Er autras mesiras sustegna la populaziun. Uschia inditgeschan 66% da sustegnair l'ura da polizia per la gastronomia, e quai gia avant ch'il Cussegl federal ha introducì questa mesira. En chaussas occurrenzas giess ina gronda part da la populaziun schizunt pli lunsch. 66% giavischassan ina limita da 10 persunas er per occurrenzas publicas.

La retschertga

Textbox aufklappenTextbox zuklappen

L'institut da perscrutaziun Sotomo ha fatg la retschertga sin incumbensa da la SRG SSR. En tut han 34'872 persunas respundì las dumondas publitgadas online tar RTR, SRF, RSI, RTS e Swissinfo. Questa tschintg'avla retschertga davart la crisa da corona è vegnida fatga dals 23 fin ils 28 d'october 2020. La quota da sbagls munta a +/- 1 punct procentuals.

RTR novitads 17:00

Artitgels legids il pli savens

Scrollar a sanestra Scrollar a dretga