En Svizra pudessan las pajas crescher l’auter onn en media per 2,2%. Quai resorta d’ina enquista da l’Institut da perscrutaziun da la conjunctura da l’ETH Turitg KOF. In tal augment fiss dentant anc adina pli bass che l’inflaziun che muntia a radund 3%. Quai malgrà ch’er represchentants dals lavurants precauts pretendan che las pajas creschian l’auter onn marcantamain, sco la «NZZ am Sonntag» scriva. La Societad svizra d'emploiads da commerzi pretenda per exempel enfin 4% dapli paja.
Persunal da gastronomia sco profiteurs?
Tenor retschertga dal KOF pudess il persunal da la gastronomia profitar da 4,4% dapli paja. Ils ustiers ed hoteliers reageschian cun quai sin la mancanza da persunal e sin il fatg che persunal qualifitgà midia en autras branschas. Il persunal da banca na possia dentant betg quintar cun in grond augment da paja il 2023. Il sectur da finanzas quintia cun 1,5% dapli paja.
