Siglir tar il cuntegn

Header

cuntegn

Rusna en las finanzas Schef da l'armada vul empustar armas malgrà stretgas finanzialas

Tar l'armada svizra dettia ina rusna finanziala. 1,4 milliardas francs mancan en ils proxims trais onns. Pajaments pli gronds per armar possia l'armada puspè far suenter 2030.

Malgrà la rusna en la cassa vul il schef d'armada Thomas Süssli novas armas. Uschiglio tema Süssli per las forzas terrestras da l'armada. En il futur sajan novs sistems d'artigliaria e defensiun da panzers necessaris.

En la Samstagsrundschau da Radio SRF di Süssli ch'el veglia empustar novas armas, malgrà las stretgas finanzialas. Concret veglia el dumandar il parlament per credits d'obligaziun dal parlament, er sch'i na dettia betg meds finanzials per l'armada per il mument. Uschia possia ins empustar gia uss, dentant pajar pir pli tard. Quai haja l'avantatg ch'ins vegnia sin ina glista da spetga. Las capacitads da producir armas sajan en il mument numnadamain utilisadas dal tuttafatg.

Retschertgas dad SRF han quest emna mussà che l'armada svizra è en stretgas finanzialas. Tenor insiders en l'armada dettia ina tscherta schanza che l'armada sto annullar empustaziuns d'armas pervia da la rusna en las finanzas. Envers SRF ha Süssli confermà las cifras.

Planisà cun in augment dal budget

En la Samstagsrundschau tschantscha Süssli da 800 milliuns francs che manchian cun il budget da l'armada da quai onn. E ch'ils daners mancan, na giascha vi da la decisiun dal parlament d'augmentar il budget da l'armada main svelt. Atgnamain ha el vulì augmentar quel sin 1% dal BIP enfin il 2030, actualmain è quai planisà enfin il 2035. Pia èn main daners a disposiziun.

La raschun per questa rusna en la cassa è che l'armada ha fatg cumpras dad armas ch'èn na betg stadas budgetadas, ha Süssli ditg venderdi. Quai onn possia ins pajar tut ils quints, perquai ch'ins haja pudì spustar pajaments d'armas da 800 milliuns francs sin il 2025. Ulteriurs pajaments en la valur da 400 milliuns francs ston vegnir spustads sin il 2026, ed er 2027 dettia anc 200 milliuns francs ch'ins stoppia pajar giu. Il 2028 di Süssli che las stretgas sajan finidas.

Pervia da la stretga da liquiditad stoppia ins spustar empustaziuns. Tge consequenzas che quel spustament ha, haja l'armada gia communitgà il mars passà, ha ditg Süssli. Numerus sistems da truppas terrestras giajan a la fin. Sch'ins n'ageschia betg, lura na possia l'armada betg pli garantir numerusas funcziuns da l'armada.

audio
Situaziun finanziala da l'armada: VBS sto emprender da far quints
ord Actualitad dals 01.02.2024. Maletg: Keystone
laschar ir. Durada: 2 minutas 47 Secundas.
audio
Dapli daners per l'armada?
ord Actualitad dals 01.02.2024. Maletg: Keystone
laschar ir. Durada: 4 minutas 46 Secundas.

Spustà obligaziuns

Il schef da l'armada Thoma Süssli na tschantscha betg d'ina rusna finanziala. Tenor Thomas Süssli stoppia l'armada negoziar cun producents e furniturs d'armaziun. Sin la dumonda da la responsabladad per las stretgas finanzialas, ha Süssli ditg ch'el n'haja betg fatg sbagls. Las decisiuns per decisiuns d'armaziun surpiglia la ministra da da defensiun Viola Amherd ed il Cussegl federal.

RTR novitads 17:00

Artitgels legids il pli savens