En Svizra pretenda in'allianza da 50 organisaziuns da sanadad ch'i vegn prendì mesiras cunter il consum da zutger – quai tranter auter cun ina taxa sin bavrondas dultschas.
En Svizra pateschian 2,2 milliuns persunas da malsognas dal cor, surpaisa, diabetes u cancer. Questas malsognas chaschunian 80% dals custs da sanadad. Tar las raschuns gioghia il zutger ina rolla impurtanta. Problematic saja il consum surtut tar ils uffants. Mintga sisavel uffant pateschia numnadamain da surpaisa.
L'allianza pretenda perquai ch'i vegn desistì da zutger en mangiativas per pops e ch'i vegn limità il zutger en products per uffants.
Bavrondas dultschas sco culpant principal
La pli gronda cumpart al consum da zutger han bavrondas dultschas e dultschims cun var 85% u 85 grams per persuna e di. Rinforzà vegn quai entras il potenzial da dependenza dal zutger, damai che quel ha in effect sin il center da remuneraziun dal tscharvè.
L’allianza pretenda da desister da zutger e da substanzas dultschas en mangiativas per pops, sco era da limitar il zutger ed ina renunzia a substanzas dultschas en products per uffants. Scolas e structuras dal di na duessan betg servir bavrondas e spaisas dultschas.
Ultra da quai pretenda l’allianza in scumond da far reclama per products che cuntegnan fitg bler zutger e che sa drizzan ad uffants, naginas purschidas d’acziun per bavrondas dultschas e naginas recumandaziuns da sanadad per victualias cun zutger.
