La pandemia da corona e las mesiras tiers, sco ustarias serradas e restricziuns da viadi – han gì consequenzas sin il dumber da las naschientschas en Svizra. Quai communitgescha l'Uffizi federal da statistica. Influenzas èn era da constatar tar il maridar ed ils divorzis.
Nov mais suenter l'emprima unda da corona, pia tranter il schaner ed il mars 2021 – èn naschids 934 pops dapli che durant il medem temp da l'onn avant. Quai è in plus da 4,5%.
Dal fanadur fin l'october 2021, pia nov mais suenter la segunda unda – èn schizunt naschids bun 1’630 pops dapli. Quai è in augment da 5,5%, cumpareglià cun il medem temp da l’onn avant. Entant che l’emprima unda da pops è era vegnida registrada en auters pajais europeics, sa tracti tar la segunda unda d’in fenomen exclusiv svizzer.
Damain nozzas e divorzis
Gia avant la pandemia maridavan Svizras e Svizzers pli pauc, scriva l’Uffizi federal da statistica. Il matg 2020, pia l’emprim mais tradiziunal da maridar – hajan ins dentant registrà 42% damain maridaglias ch’anc il matg 2019.
E tar ils divorzis mussava la tendenza ensi, avant il temp da corona. Il 2020 sajan las sentenzias da divorzi percunter sa reducidas per 4% cumpareglià cun l’onn avant. Ed era suenter la pandemia dal 2022 hai dà ina reducziun da 5,6%, tenor l’Uffizi federal da statistica.
Naschientschas sco politicum – il 2020 en il Puschlav:
