Sis da diesch persunas dumandadas èn per in obligatori da purtar mascras da protecziun en la publicitad, quai uschè spert ch'avunda mascras stattan a disposiziun. In tal obligatori chattas il mument la maioritad tar la basa da tut las partidas politicas.
Da la retschertga resorta en pli, che la populaziun dat bunas notas al Cussegl federal. Las mesiras per proteger la sanadad e sustegnair l'economia vegnan taxadas sco commensuradas. Che las mesiras vegnan schluccadas pass per pass valitescha la gronda part dals dumandadas sco positiv.
Per ina maioritad èsi bun da spert puspè avrir coiffeurs e butias. Dentant èn be stgars in terz da l'avis che ustarias duessan puspè servir giasts gia las proximas emnas. Tar la basa da la PPS vulan quai be 35% dals dumandads, tar la PLD 32% e tar la PCD 29%.
Er ina gronda maioritad chatta l'utilisaziun da datas da moviment anonimisadas. E sch'igl avess da dar in di in vaccin cunter il virus, lura fiss la maioritad dals votants e las votantas per in obligatori da vaccinar.
