Las firmas da construcziun svizras guardian enavos sin in bun onn da fatschenta 2023, quai ha la Societad svizra dals impressaris constructurs (SBV) communitgà. Las svieutas èn s’augmentadas per 0,7% sin 23,4 milliardas francs. Cun resguardar la chareschia è la svieuta dentant sa reducida per 0,9%. Per il futur spetgan las interpresas svieutas levet pli bassas. Motiv per questa prognosa èn ils tschains pli auts ed ils custs da construcziun ch'èn s'augmentads.
Avunda lavur per las interpresas
Il dumber d'incumbensas novas èn sa reducidas l'onn passà per 4%. Tuttina restia ina reserva da lavur che tanschia per set mais è mez. Quai è tenor la SBV in'auta reserva.
La dumonda per investiziuns en abitaziuns, edifizis publics sco er en l'infrastructura vegnia a restar vinavant gronda. La SBV na spetga dentant betg che l'activitad da la branscha da construcziun s'augmenti l'onn 2024. Raschuns èn ils custs da construcziun ed ils tschains ch'èn pli auts.
Buna situaziun per il persunal
La quota da dischoccupaziun en la branscha saja stada cun 3,4% mo minimal pli auta che l'onn 2022, ha la SBV scrit. En la media dals ultims dus onns èn 89'000 persunas stadas occupadas en la branscha da construcziun.
Per ils emploiads e las emploiadas quinta la SBV cun ina buna situaziun da l'occupaziun, malgrà las fluctuaziuns da l'economia. Cun la mancanza actuala da persunas qualifitgadas – vegnian las fatschentas da construcziun a vulair tegnair lur persunal.