En la segunda mesadad dal 2025 haja l'Uffizi federal per segirezza da cyber survegnì stgars 30'000 annunzias voluntarias e 145 cas da cyber che ston vegnir annunziadas. En tut il 2025 eran quai 325 annunzias obligatoricas e bun 65'000 annunzias voluntarias.
Quai saja tenor il rapport publitgà che resguarda ils mais fanadur fin december in dumber sin aut nivel. Passa la mesadad dals cas possian vegnir quintads tar il fenomen «engion». Ils onns passads han telefons d'engion ch'èn vegnids fatgs en il num d'autoritads dominà – il dumber da quests cas en la segunda mesadad dal 2025 è sa reducì.
Phishing – adina pli specific
Era vinavant datti tut diversas furmas da phishing. Ils messadis da phishing usitads, nunpersunals e tramess en in grond dumber cuntinueschan. I dettia dentant dapli variantas che sajan pli specificas ed hajan cleras finamiras, quai chaschuna custs supplementars per ils delinquents, ha dentant ina meglra quota da success.
In exempel funcziuna cun uschenumnads puncts da fidaivladad: ina pagina d'internet ch'è en funcziun ha scrit ch'il client u la clienta haja in tschert dumber da puncts da fidaivladad. Uschia han las victimas pudì metter objects sco velos u smartphones en in chanaster da rauba, fin ch'ils puncts da fidaivladad èn stads duvrads. Per pudair retrair la rauba han els lura dentant stuì pajar taxas ed inditgar datas sensiblas per ils products supponids. Questa strategia funcziuna tenor il rapport, perquai ch'ella nizzegia la tema da las retschavidras e dals retschaviders da l'empustaziun da manchentar in'occasiun.
Ladernitsch d'identitad da firmas
Betg mo persunas privatas sajan pertutgadas da l'enguladitsch d'identitad, mabain pli e pli savens er interpresas. Il motiv per quai è la gronda credibilitad d'in num da firma etablì – quel maldovran ils attatgaders per lur intents. Periclitadas spezialmain èn en quest connex interpresas senza cumparsa en l'internet.
Ils criminals da cyber procedan tenor il rapport da l'uffizi federal sistematicamain: els guardan tras ils registers da commerzi per chattar interpresas adattadas, registreschan domenas adattadas e fan silsuenter ina pagina d'internet per lur num. Per far in effect serius surpiglian els indicaziuns uffizialas sco adressa e numer dal register da commerzi da l'interpresa.
Sin questa via realiseschan els lura differentas maschinas d'engion – da webshops falsifitgads fin plattafurmas per investiziuns online. In exempel concret ha pertutgà ina firma fiduziaria ch'è s'etablida cun ina preschientscha da passa 10 onns sin il martgà. Ils delinquents han utilisà datas dal register da commerzi ch'èn accessiblas publicamain, han creà ina pagina d'internet adattada ed èn sa preschentads envers la clientella sco interpresa.
Els han pretendì pajaments anticipads per acziuns da servetsch fiduziar supponidas, senza dentant mai avair furnì prestaziuns. Entant che las victimas han pers daners, ha la vaira firma suffrì in donn considerabel da reputaziun, perquai che persunas d'ordaifer han mess en relaziun faussamain las activitads d'engion cun questa firma.
L'entir rapport
Engol da datas – era cun squitsch
La populaziun e las organisaziuns svizras èn stadas pertutgadas er durant la segunda mesadad da l'onn 2025 dad andaments da datas e da lur consequenzas che duran per part ditg – quai è da leger en il rapport. En egl han dà en spezial enguladitschs da datas pli veglas, perquai ch'els pon anc adina servir sco med d'agid prezius als attatgaders.
Uschia hai per exempel dà observaziuns che datas serradas e sensiblas vegnan reutilisadas sistematicamain dals attatgaders er en Svizra. Cun menziunar en e-mails il num, la data da naschientscha u numers da telefon da las victimas pon las campagnas da phishing cumparair pli credibel.