- Cun var 3,4 milliardas francs vul il Cussegl federal preparar l'armada spezialmain meglier cunter attatgas da la distanza e da la zona da cyber.
- El ha deliberà la missiva correspundenta per mauns dal parlament. Vitiers vegnan credits supplementars da var ina mesa milliarda francs.
- Ultra da quai planisescha la regenza investiziuns da totalmain 562 milliuns francs per modernisar stabiliments militars sco er per mesiras supplementaras da protecziun cunter la canera.
En il center da la missiva da l'armada 2026 ch'è vegnida preschentada venderdi dal minister da defensiun Martin Pfister stattan l'engrondiment da la defensiun aviatica per terra, la protecziun cunter dronas sco er abilitads supplementaras en il spazi da cyber.
«La missiva da l'armada è vegnida midada, il Cussegl federal ha priorisà da nov», di Pfister. Uschia rinforzia il Cussegl federal la defensiun cunter smanatschas las pli probablas – attatgas ord distanza e conflicts ibrids, hai gì num.
La guerra da la Russia cunter l'Ucraina haja marcà ina «cesura» da la politica da segirezza e mussà che l'armada stoppia puspè sa drizzar pli fitg sin la defensiun e sin la protecziun d'infrastructuras criticas, scriva l'armada en la communicaziun a las medias. «Er la guerra en l'Iran ha consequenzas per l'Europa», ha Pfister ditg a la conferenza da medias.
La Svizra n'è actualmain betg protegida avunda
Pfister punctuescha che las investiziuns en l'armada sajan indispensablas. Per garantir la segirezza da la Svizra a lunga vista dovria quai ils proxims 10 onns circa 31 milliardas francs.
Per quest intent haja il Cussegl federal gia concludì d'augmentar la taglia sin la plivalur a temp limità. «La Svizra na saja actualmain betg protegida avunda cunter las furmas da smanatscha las pli probablas», ha declerà Pfister. Sco pajais neutral stoppia ella extender sistematicamain sia abilitad da defensiun per esser preparada per ils conturns midads.
Defensiun da l'aria en il focus
La gronda part dals meds finanzials previs va a favur da la defensiun aviatica. Dus projects centrals duain rinforzar la protecziun en il spazi d'aria:
- Per l'ina planisescha la Confederaziun da cumprar ulteriuras unitads da defensiun IRIS‐T SLM en la dimensiun dad ina milliarda francs, uschia ch'in spazi d'aria pli grond po vegnir cuvrì ed ulteriuras infrastructuras criticas pon vegnir protegidas.
- Per l'autra duain vegnir remplazzads per 800 milliuns francs sistems antiquads da curta distanza. Per meglierar vinavant l'observaziun da la situaziun vegn ultra da quai il radar d'aviuns tactic TAFLIR remplazzà cun in sistem da radar parzialmain mobil en ina distanza mesauna. Per quest intent èn previs 150 milliuns francs.
Per 70 milliuns francs planisescha il Cussegl federal in nov sistem da defensiun cunter mini-dronas che valan adina pli savens sco smanatscha tant per unitads militaras sco er per la populaziun e per infrastructura critica.
Novas abilitads en il cosmos, en il sectur da cyber ed electromagnetic
Dus ulteriurs projects duain rinforzar la resistenza da l'armada. Per quest intent investescha la Confederaziun 30 milliuns francs en abilitads per meglierar vinavant la observaziun da la situaziun or dal cosmos. Il medem mument vegn extendì l'utilisaziun da raits da datas civilas. Per quai èn previs 100 milliuns francs. Uschia duai restar garantida l'abilitad da manar l'armada er en situaziuns da crisa. Ultra da quai planisescha il Cussegl federal da procurar per novs meds finanzials per la guerra electronica en il spazi da cyber ed electromagnetic. Per quest engrondiment èn budgetads 240 milliuns francs.
Equipament persunal e finanziaziun F‐35A
Tut ils geners da truppas duain vegnir equipads cun pistolas novas (50 milliuns francs). Ultra da quai preschenta il Cussegl federal in credit supplementar da 394 milliuns francs per procurar per ils aviuns da cumbat F‐35A. Tenor il Cussegl federal serva quel a cuvrir custs supplementars chaschunads da la chareschia, ma el resta en il rom finanzial permess da las votantas e dals votants. Uschia pudess la Svizra probablamain cumprar 30 aviuns da cumbat.