Tgi che reserva tar la plattafurma da reservaziun Booking.com in hotel u ina abitaziun da vacanzas, survegn via «Booking» en ina sort chat intern novitads directas da l'alloschi, sco per exempel ina conferma da cudeschaziun u infurmaziuns.
Pajar – u la reservaziun vegn stizzada
Amez questas communicaziuns pon er spetgar traplas da phishing. Sche la cugliunaria vegn vi da las datas da l'hotel, fan els – directamain en il num da l'hotel – in appel d'actualisar las datas da la carta da credit e quai sur in link.
«Carta betg adattada. Nus deplorain fitg questa situaziun. Per garantir er en l'avegnir Vossa segirezza, per plaschair cliccai sin quest link ed actualisai Vossas infurmaziuns. Sche Vus ignorais quest messadi, stuain nus annullar Vossa reservaziun.»
Perquai ch'il messadi vegn directamain da l'hotel via chat, saja era fitg autentic ed ins sa laschia engianar spert. Il post da medias da Booking.com scriva sin dumonda dad SRF Espresso:
Intgins da noss partenaris d'alloschis èn deplorablamain stads pertutgads dad e-mails da phishing fitg persvadents.
Ils cybercriminals s'hajan uschia procurà l'access al sistem da cudeschaziun ed èn sa dads ora sco hotel ed uschia tramess novitads. Tar Booking n'haja fin uss betg dà ina perdita da datas, scriva l'interpresa.
Il portal scriva era ch'i sa tracti d'ina pitschna part da tut ils alloschis pertutgads e da locaziuns d'abitaziuns. Tuttina «lavura noss teams cun tutta forza per gidar noss partenaris a segirar il pli svelt pussaivel lur sistems». E Booking empermetta er da sustegnair la clientella pertutgada, «inclusiv il sustegn per restituir ils custs».
