En la sessiun d'atun dal Cussegl naziunal e dal Cussegl dals chantuns pudessi dar pli grondas debattas en connex cun pliras fatschentas. Qua in'invista en ina u tschella:
«Fairness» per pèrs maridads
Pèrs maridads duain vinavant dastgar quintar ensemen lur entradas en la decleraziun da taglia e betg vegnir disfavurisads envers persunas nunmaridadas. Quai pretenda l'iniziativa «Gea a taglias federalas gistas er per pèrs maridads» da la partida Il Center. Il Cussegl naziunal tracta questa fatschenta en la segunda emna da la sessiun. Il Cussegl federal propona da refusar e metta l'accent sin il project, cun il qual l'imposiziun da taglia individuala duai vegnir introducida. La cumissiun economica dal Cussegl naziunal parta questa tenuta mo fitg stretg cun 13 cunter 12 vuschs.
Franar l'immigraziun
Il dumber da persunas che stattan en Svizra na duai betg dastgar surpassar 10 milliuns persunas. Quai pretenda l'uschenumnada «iniziativa da persistenza» da la PPS. Durant dus dis da la terza emna da la sessiun vegn il Cussegl naziunal a manar ina debatta dad uras a la lunga. Il Cussegl federal e la cumissiun economica dal Cussegl naziunal proponan da refusar l'iniziativa senza cuntraproposta. Ina minoritad da la cumissiun da la PPS propona d'acceptar quella, ina minoritad dal Center vul ina cuntraproposta.
Tgi paja la 13avla renta da l'AVS?
La 13avla renta da l'AVS, ch'ils votants e las votantas svizras han approvà il mars 2024, duai vegnir finanziada cun augmentar la taglia sin la plivalur per 0.7 puncts procentuals. Questa proposta ha fatg la cumissiun per la segirezza sociala dal Cussegl naziunal durant la segund'emna da la sessiun. Auter che quai ch'il Cussegl grond aveva proponì, vul la cumissiun auzar la taglia sin la plivalur fin l'onn 2030. Ils Cussegl dals chantuns aveva percunter decidì en la sessiun da stad in modell che vul, sper l'augment da la taglia sin la plivalur, era finanziar la 13avla cun deducziuns da la paja pli autas. Minoritads da las cumissiuns vulan s'engaschar per quest modell u variantas da quel.
Schleppa per «plants collectivs»
La maioritad dal Cussegl naziunal aveva visà dal privel d'ina «americanisaziun» da noss sistem giuridic cura ch'ella ha refusà l'introducziun da plants collectivs en Svizra durant la sessiun da stad. La Chombra gronda è perquai gnanc ida en sin il project correspundent dal Cussegl grond che vuleva adattar la procedura civila. Uss propona era la cumissiun dal dretg responsabla ch'il Cussegl dals chantun duai refusar l'idea. Sch'il Cussegl dals chantuns suonda a la recumandaziun en la segunda emna da la sessiun, lura è il project dals plants collectivs en Svizra giud maisa.
Smanatscha il collaps da la «Lex China»?
Avant tschintg onns eran ils dus cussegls anc d'accord: Investiziuns da l'exteriur en firmas svizras duain vegnir controlladas ed approvadas dal stadi. Il project concret dal Cussegl federal per pudair realisar quest intent aveva il Cussegl naziunal approvà durant la sessiun d'enviern passada. La cumissiun da l'economia dal Cussegl dals chantuns pudess ussa dentant franar il project. Ella dumonda la Chombra pitschna da betg entrar en il sboz da lescha durant la terza emna da la sessiun.