En la sessiun d'enviern dal parlament è vegnì discutà il pachet da spargn planisà per ils proxims onns. Il Cussegl dals chantuns ha fatg intginas midadas vi da la proposta oriunda da spargnar dal Cussegl federal. Uschia èn ils respargns vegnids reducids da oriundamain 2,4 fin 3,1 milliardas ad 1,4 fin 2,1 milliardas per onn. Quai è ina reducziun da 35% en cumparaziun cun ils plans oriunds.
Ultra da quai è vegnì discutà il preventiv 2026 che prevesa in frain a l'indebitament. Las entradas vegnan stimadas a 90,4 milliardas e las expensas a 91,1 milliardas. Malgrà las differenzas tranter las duas chombras èsi stà pussaivel da sa cunvegnir.
In punct dispitaivel è stà il milliun supplementar per la protecziun da dunnas cunter violenza ch'è vegnì refusà dal Cussegl naziunal. Quai ha chaschunà ina mobilisaziun dad activistas da la Partida socialdemocratica che han lantschà ina campagna per reveder la decisiun.
Las decisiuns
Themen in diesem Newsticker
- Confederaziun quinta cun deficit da 700 milliuns
- Lingias da tensiun auta da principi en l'aria
- Budget 2026 va en conferenza d'intermediaziun
- Finalisà la revisiun da la lescha dal militar
- Vinavant daners per il program chantunal da sanar edifizis
- Cussegl dals chantuns: cumenzà debatta davart il pachet da spargn
- Mesiras pli rigurusas per criminals da l’ester
- Daners supplementars per «Tox Info»
- Cussegl naziunal vul restrenscher fieus artifizials
- Dapli persunal per l'Uffizi federal da polizia (fedpol)
Tema principal – Preventiv da la Confederaziun per l'onn 2026
En il preventiv da la Confederaziun per l'onn 2026 lascha il frain a l'indebitament al parlament in spazi d’agir da 372 milliuns francs. Quai saja daventà pussaivel mo grazia a mesiras da spargn ed entradas da taglia nunspetgadas dal chantun Genevra, admonescha il Cussegl federal. Las cumissiuns da finanzas dad omaduas chombras proponan tuttina dunsainas d'adattaziuns.
La terza emna da la sessiun tracta il Cussegl dals chantuns ultra da quai il «pachet da distgargia 2027», cun il qual il Cussegl federal vuless distgargiar las finanzas federalas per fin 3 milliardas francs ils proxims onns.
Agid per l'industria d'armament svizra
En cas da «Circumstanzas extraordinarias» duai il Cussegl federal pudair permetter l'export da material da guerra svizzer e quai, sut tschertas cundiziuns, er en pajais ch'èn en in conflict armà.
Ultra da quai duai crudar il scumond per stadis da dar vinavant material da guerra cumprà en Svizra ad auters pajais. Quai propona la Cumissiun per la politica da segirezza al Cussegl naziunal. Il parlament vuless metter sut tetg questas adattaziuns da la lescha davart il material da guerra sche pussaivel en questa sessiun. La PS ed ils Verds han gia annunzià il referendum per quest cas.
Tegnair puspè la muniziun a chasa
Per demonstrar che «la Svizra dispona d'ina ferma voluntad da sa defender», propona ina pitschna maioritad da la cumissiun per la politica da segirezza dal Cussegl dals chantuns da puspè dar muniziun da tastga a chasa als commembers da l'Armada svizra. Ina minoritad da la cumissiun avertescha che la muniziun a chasa pudess «vegnir duvrada en affect» e refusa energicamain la pretensiun.
Luf danovamain en mira
Il Cussegl naziunal ha da decider davart duas moziuns che vulan levgiar il sajettar lufs problematics. L’emprima moziun vul ch'i saja en il futur pussaivel da sajettar in luf che ha stgarpà nursas independent nua che quai ha gì lieu e durant l'entir onn, era sche quel è part dad in triep da lufs.
La segunda moziun vul far pussaivel da sajettar lufs problematics en ils asils da selvaschina. Sche era il Cussegl naziunal di gea a las duas moziuns sto il Cussegl federal preschentar ina adattaziun da la lescha da catscha.