Il 2027 vul la Confederaziun spargnar 2,4 milliardas francs. Ils onns 2028 e 2029 lura mintgamai enturn trais milliardas. Quai cun stritgar en tut divers secturs las expensas – per exempel:
- tar il traffic public
- tar la tgira d’uffants
- tar universitads
- tar il persunal da la Confederaziun
Questa glista cuntegna 60 mesiras da spargn.
Quai sustegna Martin Schmid, il cusseglier dals chantuns dal Grischun e da la Partida liberaldemocratica. La Confederaziun haja ils ultims onns gì memia bleras expensas ed uss stoppian ins strenscher la tschinta. Tenor el saja quai pussaivel da spargnar.
Dentant ha era Martin Schmid intgins giavischs nua ch'i na duess betg vegnir spargnà. Sch'i va per l’eroport regiunal da Samedan, per il transport e la Viafier retica u era tar l’agricultura. La gronda part sustegna el dentant tar quest pachet da spargn u era numnà pachet da distgargiar. Ils giavischs individuals fan grev la vita a quest pachet.
Adina pli debel
La proposta dal Cussegl federal da spargnar 2,4 milliardas è gia vegnida indeblida da la cumissiun da finanzas per 600 milliuns francs. E cun las vuschs criticas pudess quest trend ir vinavant ed indeblir il pachet era en ils cussegls.
Eva Herzog, cussegliera dals chantuns per Basilea-Citad, spera ch'i vegnan anc stritgadas intginas chaussas. Sco exempel di ella l’armada che vegn exclusa da quest pachet da spargn – anzi, l’armada duai survegnir pli svelt dapli raps. Tranter auter pervi da quai pensa Eva Herzog che quest pachet n'ha naginas grondas schanzas.
Da la critica è era conscient Martin Schmid – el vesa dentant bunas schanzas per quest pachet. Per el saja cler che la Confederaziun ha memia autas expensas.