Uniuns da sport da giuventetgna duain en l'avegnir survegnir pli paucs raps. La Confederaziun ha annunzià da scursanir las subvenziuns per Giuventetgna+Sport (J+S) per 20%. Quai vala a partir dal 2026. Tenor il Cussegl federal crescha la dumonda per ils curs da J+S. Il medem mument stoppian ins dentant spargnar.
Var 680'000 uffants e giuvenils fan mintg'onn part a curs e champs da Giuventetgna e Sport en l'entira Svizra. Sco che l'agentura da novitads Keystone-SDA rapporta, vegnan tut las uniuns, organisaziuns ed associaziuns ad esser pertutgadas medemamain.
Pertge vegnan las contribuziuns scursanidas ?
Il BASPO na reducescha betg las contribuziuns pervia da mesiras da spargn. Il problem è ch'il budget fixà da 115 milliuns francs na tanscha betg pli. Damai ch'i dat dapli champs, damai ch'i vegn sustegnì dapli sports e perquai che dapli uffants sa participeschan a trenaments en general, è il budget memia pitschen per mantegnair il sustegn sco fin qua.
500'000 francs pli pauc per il Grischun
«Displaschaivla» numna Thierry Jeanneret la decisiun dal Cussegl federal. El è manader da la partiziun sport da l'Uffizi chantunal per scola populara e sport. Ins saja s'engaschà per dapli uffants e giuvenils en il sport – e quai cun success. Ins haja nudà dapli persunas, sco er dapli disciplinas da sport. Ma gist quest success procuria ch'ils meds stoppian vegnir scursanids.
Nus essan victimas da l'agen success.
Il manader da Grischun Sport Thierry Jeanneret ha anc speranza. Tenor el po il parlament federal augmentar il preventiv anc en la sessiun da december. Quai beneventass el fitg, cunquai che questas contribuziuns da J+S sajan ina part impurtanta per las uniuns e per la lavur prestada voluntariamain.
Teoreticamain fissi er pussibel ch’il chantun Grischun cumpensescha quai che la Confederaziun scursanescha. Quai fiss dentant ina decisiun che la politica chantunala stuessia pigliar, suenter ch’il parlament federal ha decidì davart il budget.
Ch'ins vul uss stritgar daners dals sportists giuvens – quai è simplamain extrem donn.
Ils trenaders e las trenadras fan lur lavur per gronda part voluntarmain. Ch'ins veglia uss anc scursanir ad els ed ellas la pitschna indemnisaziun na saja betg chapaivel, declera el vinavant. Era il president da l'associaziun grischuna da hockey, Erwin Stauffacher, vesa quai problematic. Per el na giaja quai betg ch'ins stoppia spargnar en il sectur da furmaziun e sport. La Confederaziun stoppia ponderar nua spargnar, e nua betg.
En il sectur da la furmaziun e dal sport èsi simplamain il fauss lieu per spargnar.
Era Barbara Janom-Steiner, presidenta da l'Associaziun grischuna da skis, è da quest avis. L'anteriura cussegliera guvernativa dal chantun Grischun spera fitg ch'il parlament vegnia anc a curriger quai. Per quai intent faschess ella er diever da ses cudesch d'adressas.
Sa chapescha vegn jau a contactar las deputadas ed ils deputads grischuns per pudair effectuar insatge.
Adattà al tema