La sportista d’atletica leva è vegnida undrada sco sportista grischuna da l’onn 2025. Annik Kälin ch’è s’etablida tar ina da las meglras dal mund en il heptatlon sco er en il siglir lung – ha gudagnà l’elecziun avant il skiunz da Samignun Thomas Tumler ed il passlunghist da Tavau Valerio Grond. Kälin è uschia la successura dal skiunz Stefan Rogentin da Lai.
Il pli grond success da Kälin il davos onn è stà il quart plaz en il heptatlon dals gieus olimpics da stad a Paris. Plinavant ha ella mintgamai gudagnà argient al campiunadi europeic en halla ed al campiunadi mundial en halla, quai en la disciplina siglir lung. Ultra da quai ha Annik Kälin, che abitescha da nov a Rofels sur Maiavilla, rut pliras gia ils records svizzers en siglir lung ed en il heptatlon.
Sara Schmied è la newcomra da l'onn
Sco meglra noviza da l’onn è vegnida onurada Sara Schmied da Schlarigna che ha lantschà ina carriera en il sport da skeleton. Ella è sa messa tras en ina concurrenza rumantscha encunter la skiunza Lara Bianchi da Sursaissa e la passlunghista Nina Cantieni da Samedan.
Plinavant ha Toni Calonder da Masein survegnì il premi sco trenader e funcziunari da l’onn. Calonder che ha 66 onns s’engascha dapi passa 40 onns per il Club da skis Beverin e per la Federaziun da skis grischuna. Sco meglra uniun da l’onn è vegnida tschernida il Club da tennis da Domat. E l’atlet grischun da l’onn 2025 cun impediments è Jonas Frei, il pilot da parabob.
Andres Ambühl il star da la saira
In premi d'onur ed uschia in premi tut spezial ha survegnì Andres Ambühl che ha terminà dacurt sia lunga carriera. Ambühl ha giugà 25 onns hockey, la gronda part tar il HCD, ed è stà a 20 campiunadis mundials cun l’equipa naziunala svizra. Avant strusch duas emnas ha quella pers il final dal campiunadi mundial en Svezia encunter ils Stadis Unids – ed Andres Ambühl ha uschia gudagnà sia terza medaglia d’argient.
Ina saira da gala
La Notg da sport grischuna vegn onn per onn organisada da la Federaziun da sport grischuna per undrar las prestaziuns d’atletas ed atlets grischuns. Igl è dentant er in sa vesair cun la famiglia sportiva ad in saira da gala en l’Auditorium da la Banca Chantunala a Cuira.