En Grischun eran il settember 722 persunas en tschertga da lavur. Quai èn 84 dapli ch'il mais avant. Cun 0,7% resta la quota da dischoccupaziun dentant fitg bassa.
Sco che l'Uffizi per industria, mastergn e lavur dal Grischun communitgescha saja la gastronomia cun 161 persunas il sectur cun la pli gronda dischoccupaziun, suandà dal sectur da sanadad e social-esser (71 persunas) sco er da la branscha da construcziun (55 persunas). Dapli umens (400) eran registrads sco dischoccupads che dunnas (322).
Quota fitg bassa en Svizra
En Svizra è la quota da dischoccupaziun anc ina giada sa reducida il settember per 0,1% en congual cun l'avust. Ella munta ad 1,9%, sco il secretariat statal per economia SECO communitgescha. Uschè bassa è la quota da dischoccupaziun stada l'ultima giada avant passa 20 onns.
La fin da settember eran anc radund 89'526 persunas en Svizra registradas sco dischoccupadas. Quai èn 1'846 damain ch'anc l'avust. Per las interpresas èsi actualmain uschè grev sco daditg betg pli da chattar persunal adattà.
