Patruns da lavur duain en l'avegnir stuair porscher temps da lavur flexibels per persunas cun impediments ed er porscher a quellas servetschs online senza barrieras. Plinavant duai la lingua da segns vegnir renconuschida.
Il Cussegl federal ha tramess en consultaziun ina revisiun parziala da la lescha davart l'egualitad da persunas cun impediments. Cun quella duain persunas cun impediments vegnir protegidas meglier da discriminaziun en il mund da lavur. Il Cussegl federal ha plinavant decis da metter a disposiziun in ulteriur mez milliun francs per differents programs da promoziun.
Pretschs da generica
Ils pretschs da generica en Svizra duain vegnir reducids. Cun adattar las marschas dals medicaments vul il Cussegl federal spargnar radund 60 milliuns. Las organisaziun da protecziun da las consumentas e consuments vesan però anc in bler pli grond potenzial che na vegnia betg duvrà.
Fin ussa dependevan las marschas ferm dal pretsch dals medicaments. Cun unifitgar las marschas vegni ussa reducì ils fauss impuls da vender ils pli chars medicaments per far uschè bler gudogn sco pussaivel. La midada da l'ordinaziun ch'il Cussegl federal ha decis va en vigur sin l'entschatta fanadur.
750 milliuns per svelt internet
La rait duai vegnir pli svelta, er ordaifer dals centers. Il Cussegl federal ha dà l'incumbensa al Departament federal per traffic, ambient ed energia d'elavur in sboz per in program da promoziun.
Finanziar il program vul il Cussegl federal cun las concessiuns da func mobil. Er la branscha ed ils chantuns duain sa participar.
Er en territoris pac abitads duai il program motivar las purschidras da metter a disposiziun ina buna rait da telecommunicaziun. La differenza tranter las expensas per schlargiar la purschida e las entradas cun quella duai il program.
Sper la rait da func mobil duain er las colliaziuns da fibra da vaider en las abitaziuns vegnidas bajegiadas ora. Per territoris cun pauca populaziun duai la rait da func mobila vegnir meglra.
Bajegiar or la rait da fibra da vaider er en quels territoris custass 1,4 milliardas francs, tenor il Cussegl federal. La rait duai dapertut porscher ina sveltezza d'in gigabit per secunda.
Nagina renta da vaivs e vaivas pli
En Svizra na duai betg pli dar rentas da vaivs e vaivas per vita duranta. Il Cussegl federal ha tramess en consultaziun ina midada da lescha che vul tractar tuttina tut las persunas ch'han pers l'um u la dunna, sche quellas han uffants cun dretg d'aliments.
Las prestaziuns per survivents duain da nov sa drizzar al temp da tgira e d'educaziun. Uschia duain las rentas vegnir pajadas fin tar il 25avel anniversari da l'uffant il pli giuven u er pli ditg sch'i vegn tgirà in uffant creschì impedì. Survegnir questas prestaziuns duain tut ils geniturs independent dal stadi civil.
