Saira sontga a Visp, paucs dis avant la votaziun davart la candidatura per ils gieus olimpics. Igl è chaud, però surtratg e tranteren datti in dagut u l’auter. L'aura na sa betg dal tut tge ch'ella duai far – mez trid / mez bel. Uschia sco l'aura èn era Vallesanas e Vallesans tranter sutgas e bancs. Almain quels che piglian posiziun davant il microfon.
D'ina vart vulan ins sustegnair il turissem, ma da l'autra è l'aspect finanzial.
Ella haja gist oz emplenì ora il cedel da votar. Sche l’aspect turistic u l’aspect da finanzas ha fatg la cursa na vuleva ella betg tradir.
Igl è ina votaziun nua ch'i va per bler ed era Visp fiss part dal project. Ils turniers da Curling fissan planisads a Visp. Ma d'in squitsch d'aderents u adversaris na possian ins betg discurrer, di la gronda part da las passantas e dals passants.
Placats zuppads
Enturn la staziun da Visp èn il gieus olimpics pauc preschents. Placats èsi da tschertgar e quels ch’ins chatta propagheschan in na. E quai, dian era ils Vallesans e las Vallesanas a Visp, reflecteschia era plitost il resultat ch'i vegnia a dar dumengia tenor lur sentiment dal venter.
Sco jau ves la situaziun, dian ils giuvens plitost gea ed ils pli vegls plitost na.
Per intgins è la debatta omnipreschenta entant ch'ils auters dian ch'il cumbat da votaziun per ils gieus olimpics Sion 2026 saja pli quiet, cumpareglià cun autras votaziuns.
Da la saira sontga vegni plaunet notg a Visp. I vegn pli stgir e las glischs sin via sa tschentan en. Ma sche la glisch olimpica, la flomma vegn era envidada il 2026 en il Vallais è per il mument anc en il stgir. Las discussiuns sin las vias da Visp han en mintga cas pli pauc fieu che pensà.
RR actualitad 17:00
