L'incendi da guaud en il Centovalli en il Tessin è sut controlla. Sco ils pumpiers han ditg a l'agentura da novitads Keystone-SDA, observian els il mument anc intgins cuaditschs. Els na spetgian dentant betg ch'il fieu vegnia puspè pli ferm. Uschè ditg ch'il vent na s'augmentia betg, saja la situaziun sut controlla.
En tut han las flommas destruì 55 hectaras guaud, quai correspunda a la surfatscha da 70 plazzas da ballape. Ed els hajan stuì evacuar 21 persunas or dal vitg Verdasio, han ils pumpiers tessinais declerà. Duas chasas da vacanzas èn vegnidas destruidas. Rut or era l'incendi la mesemna
L'incendi da guaud a Verdasio è gia il terz en il Tessin ils davos mais. Gia la fin da schaner aveva in grond incendi al Monte Gambarogno destruì bler, duas emnas avevan ils pumpiers duvrà per stizzar quel.
Era a Cuira pitschens incendis
Ils pumpiers da la citad da Cuira han annunzià il venderdi, ch'els hajan stuì vegnir en acziun aifer 48 uras trais giadas pervia dad incendis da cultira. La situaziun vegn actualmain valitada cun in privel «considerabel». Uschia èn fieus en il liber bain lubids, ils pumpiers da la citad averteschan dentant ch'in cumportament responsabel da la populaziun saja impurtant.
