Siglir tar il cuntegn

Header

cuntegn

Situaziun tendida La mancanza da medicaments en Svizra crescha

En Svizra mancan medicaments. Blers na datti insumma betg u ch'igl è grev da survegnir els. Tar enturn 200 da quels munta questa mancanza in problem serius. Suenter che quests medicaments han gia mancà l’enviern passà, è la situaziun era critica tar products pli usitads.

La glista dals products e da las substanzas che mancan è lunga. Quai è visibel tant sin la plattafurma per stretgas da medicaments, drugshortage.ch, la plattafurma per stretgas da medicaments da l'Ospital universitar da Genevra, sin l'apoteca online Zur Rose u da la glista da l'Uffizi federal per provediment economic. La situaziun è fitg tendida.

Tenor la plattafurma drogshortage.ch mancan 786 products, tranter quels èn 360 substanzas activas. Tranter auter vai per substanzas d'antibiotica, meds quietants, vaccins u meds per diabetichers.

Situaziun tendida

Il schef-apotecher da HUG Pascal Bonnabry discurra d'in svilup «inquietant» che pertutgia l'entir pajais. Enfin che la raschun dal problem saja eliminada, recumonda la Taskforce svizra «Stretgas da medicaments» da distribuir vinavant tscherts medicaments en quantitads parzialas. Tar l'Ospital universitar da Genevra lavurian entant duas persunas a temp cumplain per chattar alternativas per ils products che mancan.

Medikamente in Tablettenform
Legenda: Tranter auter mancan substanzas d'antibiotica, meds quietants, vaccins u meds per diabetichers. (maletg simbolic) Keystone

Per tge ina tala mancanza?

La mancanza da tscherts medicaments è per part d'attribuir a la fiera pitschna en Svizra. Per producents saja la Svizra main attractiva ch'ils pajais vischins pli gronds, hai gì num tar l'apoteca online Zur Rose.

«Intgins medicaments pudessan svanir insacura da la fiera svizra, sch'els n'èn betg gia svanids», ha ditg Simon Marquard dal post da medias da l'apoteca online a Keystone-SDA.

Il squitsch sin ils pretschs saja aut, ha el ditg vinavant. Era sch'ils medicaments vegnian adina pli bunmartgads, na sa paja quai betg per producents da products che han nagina protecziun da patentas pli.

La procedura d'admissiun saja pretensiusa e cumplexa. E la procedura d'admissiun separada che saja necessaria en Svizra na rendia betg adina en vista a las pitschnas quantitads che la fiera lubeschia. L'Uffizi federal per il provediment economic dal pajais (UFPE) renda attent ad in'ulteriura difficultad: la necessitad da translatar tut ils cedels cun indicaziuns agiuntadas en trais linguas.

audio
Per tadlar: las novitads da las 12:00
ord RTR Audio dals 24.12.2023.
laschar ir. Durada: 2 minutas 51 Secundas.

RTR novitads 12:00

Artitgels legids il pli savens